مكتبة الشـــــاعر الزول ::: محمد الحسن ســـــالم حميــــد

امــــــــــــلا قلبــك
محد الحسن ســــالم حميد



أملأ قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش .. بالجنود الوين تخش في سبيلك كالنهارْ
بالمداد الما بيغُش .. بي وتر جاء من الجحيمْ
أملأ قلبك بالنسيمْ
ملِّي بالطير الرطنْ
طيبة والعالم قديم ... ينسى كالريح ... المحنْ
خلِّي بالَك مستقيم دغري وإن مال الزمنْ
راحل الليل البهيم والبصيرات ما عِمَنْ
الظروف الليلي أبن ... طيبة لا خوف لا حزنْ
باكر التِّقْيات تنورق وتنملي الضرعات لبنْ
طيبة يا صمت الحنين كلما طفاهو همْ
لا في آهة ولا أنين لا بيروع ليح ودمْ
من مرارات السنين من عصارات الألْم
بيمرق الشوق الدفين بي كعنكيل العشمْ
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء ... غيمة غيمتين .. غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ ... من بدل تفرح تَنِقْ
الشِّكايات ... السخط .. لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول ...
ظاهر الحال ماهو مخفي ....... وقولنا فيك ما فيهو قول
نسمة كل راس ساعة تكفي ....... نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ... لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ .. وانتي يا كتمات تطولي
اليطول بال الخلق .. طَرِّقْ الغنوات يا زولي
عدّ فات الريح شَرِقْ من بعد ما جاب سحاب
من بعد قشّ التراب ... مشط القش والشجر
رجّع الطير للوكرْ
ها البرق شال البرق ..
الرعد ريحة الدعاش
ابشروا بالخير نقطت
أي والله المطر

تعال قص البلد وارجع


تعال قص البلد وارجع
تعال ادي الغبش طلة
بقالا اليل غطى ومقنع
سترتك يا صباح الله
ضراعك مدو لي رضع
ضروع اماتا قطن قط
مراكب شوفا لا مشرع
ولا بان في مداين شط
تعال يا شافي يا كافي
شموخاً في زمن منحط
من الفي تعال بجي المافي
معاك وهطنا نتوهط
تعالنا نحن من شفع
نفك الحيرة بي حيرة
متين ما الليل نصن
نسمع وراء الاهات غلب نوره
ابوى قالولنا جيبن ده
صباحات الله بخيرها
تويب امي الزمن هدا
صباحات الله بخيرها
وصباحات الله لاقيتا
لا كراسا لا قلما
صباحات الله لاقيتا
ململم في العيون الما
صباحات الله لاقيتا
تجود في الضحى وتضفر
صباحات الله لاقيتا
تليس في شقوق بيتا
صباحات الله لاقيتا
اكان لاقيتا في مشرع
محل لاقيتا تنذمر
مكان خليتا تتوجع
اكان لاقيتا في مستشفى
في طندايا جامع سوق
محطة ملمة اكان في بيتا أو مصنع
محل لاقيتا تنذمر
مكان خليتا تتوجع
تكد تكدح تباصر كم رجاء اتقطع
ابت تطلع طلع خازوق
خوازيق البلد زادت
طلع نمراً وراهو ضباع
وضاع ما ضاع
وكان ما كان
طلع خازوق
يفيض النيل نحيض نحن
يظل حال البلد واقف تقع محنة
طلع خازوق
خوازيق البلد زادت
سالت عليها
مشيت ومشيت
مشيت خشيت على حلة
لاقيت شعاع ضال
من ضو صباح الله
لاقيت شعاع اسمر
قاعدلو فوق بنبر
كابي المرس يسكر
قنبت جنبو معا
دار الحديث ما دار
حدثني بحرقة
حبيتا من جواي
حبيتا حبيتا
في الحلوة والمرات
شايلا القداحا معاي
ادتني واديتا
حبيتا حبيتا
في يوم من الايام
هلوست مع الفجاج
هلوست دون احلام
من دكة الحجاج
ضلوا الشمس ريحين
واحد عماك يا ام زين
والتانى شالك وطار
باعوني للفرقة
ملعون ابو الدولار
ان الشعاع الضال
انينا انينا
غنا الشعاع الضال
صنينا صنينا
غنالي بحرقة
غنالى يا هاجر
عقبت يا باكر
قاطعني يا هاجر
رددت يا هاكر
في الضلمة اولادك
في الفيها طول اليوم
لازادا لازادك
يا مرمى لا ضل بيت
لا ارث من اجدادك
يلا وجراحاتك
طحلب ضلام الليل
دهده صباحاتك
السولبك خلاك
برد الخمور مفتون
في افقر وضع ختاك
فاجر وسخ مافون
يلا وهياك يلا
لا عن صباح الله
صبح الغنا الميمون
صن الشعاع الضال
غنا الشعاع الضال
ما صن غنا وقال
يا هاجر التسعى
بين الوطن والبال
باب الفجر بفتح
فتح القلب موال
فتح اللبق في الصيف
تالا الشتل تربال
باب الفجر بفتح
يا وضع يا دجال
باب الفجر بفتح
عند دقة الرجال
غنا الشعاع الطال
غنينا طلنا سوى
شال النغم عتال
بايتين عيالو قوى
باكرنا سترة حال
ياكر رغيف وروى
باكرنا بقة فال
باكر كتاب ودوا
باكرنا للاجيال
ينشر نور وهوا
لا تلاقي فيهو وبال
لاهم بعاد لاجوى
باكرنا يا ضلال
لسع بلال ما زال
وما دام بلال لسع
على الرمضا وهجير يلسع
ما دام في اطفال بتتوجع
صباحات الله يا بيضا
لحيحة نوره لاهسع
فجيعة يا نوره يا فقرا
ترف من شدره لشدره
تلف الدنيا كايسلكم
صباحاتو ما انتو
بقوا من الارض مطره
تعالى وشى الوطن دركان
عساكر اخر الزمن واطه
تعالى وما على كيفك
تعالى وريحي الواطه
بلدنا أن جيتي دي الكوكب
تعالي من اليسار شمساً
تشرق الغربوا المركب
تغربي يا غرب يا باني الكلب
يا تجار الموت والرعب
لو ريح ليلكم طف الصحوة
نسل الصحوة في جوف الشعب
بق وضو نواحى الدرب التالا الفجر
الوطن القلب
القلب الشايلك وما ختاك
وكان ختاك ابداً ما خطاك
بس يا نوره الصاح و الصبر
لمي معانا قطنة البدري
نغزل منها كفن الليل
ننسج منها توب الفجر
فجر تكسو محنتو الفقرا
من التعب البلا صالح
يجبد الكدح الاجرا
يلا بوليس بلا اجرا
شنو الخايفينلو يا فقرا
بيوتا جنها المطره
دقيقاً ما يفك الريق
سمكة مافي في بحرا
شنو الخايفينلو يا فقرا
شديراتن بقت حطبها
تمرة ما تفك طلبها
شنو الخايفينلو يا فقرا
بهيماتاً تسوى الميع
مغبش كالترب بصرا
شنو الخايفينلو يا فقرا
كلبةً لا قلب لا حيل
وهوت في شبح فوق خيل
كان يتداعر اخر الليل
نجرت والشبح حدرها
صدت للصريف فى ترى
كان صوت الرصاص قفرها
انت والخلق نايمين
صنت والخلق نايمين
عفنت البلد يومين
كلب العمدة جاب خبرا
شنو الخايفينلو يا فقرا
شنو الداخرنو في متره
ابو الاربل لابو الواسوق ابو المحرات
وساقية تسوق لابو بقرا
يا بقر السواقي السايقى للامرا
شنو الخايفينلو يا فقرا
ابو البوليس اذا ما كان
اباتم من طرف فقرا
يحرسوا القصر للتلفان
وللفي الليل زنى ودعره
ويقوموا مع النهار وزراء
ابو اذا ما كان اراضيهم
يبس شدرا
يحرسوا طلمبة الجازولين
يقيفوا على الينوك غفرا
اذا ما الشارع استنفر
غبش عزل بستنكر
على القيصر خساستو
تقول للغيم محل مطر
قراب منك دالفينك
يضم صدر الوطن حاني
يهز للظلم ساساتو
تحن لباكر الاخضر
يعم بخيرو ناساتو
تنادى الفارس الاسمر
تطالب بي قصاصاتو
من الفجار من العسكر
ابو البوليس اذا فكر
يفك فيهم رصاصاتو
ايابوليس يا نازل من المريخ
جباة الدم من التاريخ
أيا واقفهم كالسيخ
تقيفلنا لامتين دغري
حقارتك تبقى فى فقرا
فضيحة فجيعة يا بوليس
وجايين من فرد شدرا
جنانا العاق متين تصحى
تشوف الحاصل المذري
متين تدري
يانو الصوت ده ما مكري
معتق للوطن دغري
و بانو الجاري
ما منك
على صدر الوطن يجري
وخطاهو التيربت
بس قدرها
تلاقى الفجر والفقرا

رسائل ست الدار بت احمد جابر
للزين ود حامد
( تلغرافات )

محمد الحسن حسن سالم (حميد )

( جواب أول )

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير

أم أولادك ست الدار بت أحمد جابر

ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان

( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد